36周

仲有一個月,阿囡就出世了~
開始唔捨得依家妲妃生活,
講真,老公真係超級鍚我同阿囡~
煮飯洗碗,洗衫拖地,全部老公負責,
我淨係需要訓同食~
真係豬一樣既生活,
有時連攞杯水,都會大叫老公~
等到大象出世,唔知老公仲會唔會咁錫我呢~
(不過係豬一樣既生活下,我竟然仲輕左,而大象就越來越重,醫生話佢出世應該會過8磅,陰功lor~實痛屎我.)

自從中左妊娠糖尿同高血壓後,
老公更加緊張,
返工放工都會親自接送,
就算沒車,都會叫兄弟幫手車我,或者搭車來我公司接我,
務求唔俾我一個人係街.
(沒錯啦,揸車幾個月,已經high花左架車,要入廠大修,我地已經一星期沒車用了)

另一個前世情人,
我老豆都出馬照顧我飲食,
每日中午送飯來我公司,
因為公司伙食實在太難食,
我聞到味已經想嘔,更何況塞入口,
之前都係外賣,依家老豆返左來,
所以佢負責返我飲食~

夜晚就由99負責買餸來我家煮,
不過老公嫌99煮飯實在太大龍鳳,
搞到老公洗埋碗要9點幾先搞掂,
keep左一星期度,
就癈除左99買餸來我家煮食職務.
夜晚都係老公親自出馬.

講真,我個肚真係越來越大,
依家最多行兩三個鐘,就一定要坐了,
撞正聖誕,新年,
我個心又成日好想出街玩,感受下人氣.
而我個老公大人係沒車既情況下,
又唔俾我出街.
所以成個人都好矛盾呀~
到時坐月,我可能真係會悶屎~

仲有就係,前個星期(34w)照超聲波,我可愛的囡囡竟然仲未調頭,
醫生話如果36周都唔調頭,
38周就要開刀了~
阿囡呀~你想順產定係開刀,真係完全由你話事~
橫掂你咁大隻,我都驚痛,開刀就開刀啦~燒賣就燒賣啦~haha

胎動

可能偏肥,
所以,我係20周先開始有胎動,
初初仲以為係錯覺~
淨係覺得有野彈下彈下,
跟住發現日日都有彈下彈下既感覺,
先肯定係胎動~HAHA,

真係好神奇,
有個小生命係我肚入邊,
仲要郁來郁去~
自從有胎動後,我就成日同阿B傾解,
間唔中仲會告下狀,講下壞話咁~HAHA

不過講真,真係好神奇,
我唔知係唔係所有媽媽都係咁,
我覺得阿B真係識聽我講野,
有時做野好忙,成朝沒留意阿B有沒郁,
拍下肚仔,叫佢踢兩下來FEEL下,
佢就會真係踢幾腳來回應我.
同朋友講阿B,佢又好似知我講緊佢,
係肚入邊翻滾,
搞到我成日驚自己諗衰野,俾阿B知道~HAHA

依家已經過左30W了,
開始摸熟阿B睡眠時間,
知佢同媽媽一樣,係懶訓豬,
日日要訓到十點幾先起身,
每日LUNCH前,就會起身勁郁,
夜晚食完DINNER後,就會狂踢一輪~
最緊要係,阿B都係喂食豬,一肚餓就會發爛渣狂踢,
試過半夜肚餓,俾阿B踼醒,叫我食野~
我真係訓住覺,塞餅乾入口~

呢種感覺,仲有10W就會結束,
講真,我沒唔捨得,因為我成日驚自己太懶訓,會壓到阿B,
反而好期待阿B,HAHA~

妊娠糖尿

講真,真係用唔慣呢個blog~
明明好多野想寫,
轉個頭就唔記得~

講返我大肚既心曆歷程先,
我今次真係中左招,
中左媽媽奶招,
即係孕婦奶粉,
差唔多7個月時,
我見自己重得唔多(重左4-5kg),
又驚自己成日食街外野~
營養唔夠,
所以就開始飲媽媽奶,
點知係30w糖水測試,
我就糖尿超標了,成9.4呀~(>7.8就超標)
俾醫院急call我返去玩篤手指.
怨只怨自己太放肆,日日一杯媽媽奶+兩杯利賓納+一杯橙汁,
真係想唔出事都難.

依家要一星期篤兩日手指,每日六-七次,
仲要我俾$290租部糖尿機.
不過話是話,份糖尿餐單仲豐富過我平時食~
一日六餐,份量仲要唔少tim~
即係我唔使戒食啦~
淨係戒飲野就得.
阿Q精神~HAHA

車車

成日都唔記得寫BLOG,
其實最近屋企又多左新成員,
就係....老公買左車了.
肥羊想買車好耐,依家有左大象,就更加需要架車,
出入都方便D.

8月尾已經買左,9月中收車,
本來我係淘寶買左好多靚靚,裝飾架車,
點知,集運扣關,
足足扣左兩個星期,仲係音訊全無.
我都費時追了,因為中通次次都係自動回覆,完全沒幫我查過件,
唔想因為佢而勞氣.

依家返娘家好方便呀~
半個鐘已經可以返到屋企,又舒服.
話是話,我叫老公買架大D既車,方便我大肚上落車,坐得舒服D,
點知佢買左架同貨VAN差唔多樣既家庭車,
雖然我FD話好型,四四方方~
但我真係覺得佢大得誇張,好似貨VAN~HAHA
第時可以秘撈~

急症

真係禍不單行,
係唔知食錯咩既情況下,
肚痛,狂嘔,
由11PM,一路痛到1點幾,
真係頂唔順,唯有叫老公CALL白車,
(本來想搭的士,但係半夜1點幾好難搵的士,我又痛到郁唔到,唯有用下政府福利了)

等左兩三個字度,白車就來了~
三個救護員+一個看更,浩浩蕩蕩衝入我屋企,
救命,佢地唔係以為我生得呀~
叫我千企唔好郁,
問我有沒流血,有沒不明液體流出(我諗佢地係講緊羊水)
搞搞下,我又嘔了,好樣衰,當住咁多人面前嘔,
之後就坐輪椅走了,
我勁呀~係咁危急既時候,
我仲識得叫老公俾多D貓糧阿叮,驚叮唔夠食,
又叫老公睇下叮係唔係屋企,先好鎖門~
諗返起,都覺得自己搞笑.

好快去到醫院,其實我屋企同屯院好近,
我諗行路都係四個字度,
直入急症室,基本上唔使等,就推左我入去,
姑娘幫我聽阿B心跳,一分鐘150下左右,正常,
咁我都安心D~
其實我都估到自己應該係腸胃抽筋,
只係痛太耐,驚影響到阿B~
之後醫生就來左~幫我聽下肚,幾驚佢要陰照,好彩沒,
俾左D胃藥,止痛藥我食,叫我等一個鐘,睇下會唔會好D~
(其實我真係極度抗拒食藥,驚影響到阿B,不過實在沒辦法,太痛,而且再三問左醫生,孕婦食左沒問題)
果然,差唔多半個鐘度,我就唔痛了~哈哈~
護士見我玩手機,都走來問我,係唔係好D啦~
我直頭話,唔痛了,可以走得了~

真係虛驚一場,入院兩個鐘,配左D藥,精精靈靈出院,
返到屋企都四點幾了~
難為老公陪我捱通宵,
我就梗係有一日病假,可以補眠.

而阿叮唔知係唔係都嚇親,第二日完全沒吵我,陪我一齊狂訓.
呢隻叮,見到我痛成咁,一路陪係我身邊,一齊唔訓,
又係咁喵我,好似問緊我好返D未~好SWEET.

中秋節

今日係中秋節正日,
約左老公睇戲,過下二人世界,
真係要珍惜二人世界了,
下年今日,身邊多左個大象,二人變三人,
應該都沒得靜靜地過中秋,
其實依家有個阿叮,都唔靜得去邊~哈哈.

以後一家四口,真係難以想像,
大象會唔會同阿叮打交呢?
究竟邊個蝦邊個呢?
我又會幫邊個呢?
好期待大象來臨.

又病了

星期日淋左小小雨又病了,
依家抵抗力真係出奇的差.
喉嚨痛左幾日,又狂咳,
每咳一下,都驚整到大象.
老公話我夜晚訓覺,係度怪叫,
沒辦法啦~喉嚨真係又痕又痛,
要發聲先可以解痕.

阿叮好SWEET呀~琴晚我又咳醒,
叮跳上床喵我,仲LAM我塊面,
好似問緊我,有沒事呀~
反而衰佬就帶住耳塞訓覺,
老婆起身,佢都唔知.

其實真係好內疚,
平時好耐都唔病下,
自從有左大象後,已經第二次病了~
搞到大象訓都訓得唔安樂,
媽媽知衰了,
跟住果五個月,一定會好好保重身體,
手袋入邊一定長備遮,披肩,令自己安全.
沒咩事都唔出街,盡量令自己唔好再病.

性別之迷

本來係照唐氏時(12W+),遇到個好護士長,主動幫我地照埋性別,
而我亦都見到類似古古既物體,所以一心一意,諗住係仔仔.
點知之後私家產檢(16W+),醫生話可能係女女,完全呆左~
雖然,我同肥羊男女都喜歡,
但因為之前以為係仔仔,已經買左好多粉藍色衫仔~
而且我地都一直稱呼大象為阿仔~
突然要轉口風,HAHA~

但醫生話大象側住身,睇得唔係太清楚,憑佢經驗,就七成係女.
所以就當佢係女先啦~
好後悔上次開倉沒買幾件粉紅色衫仔,
明明見到好靚,好想買,但諗住係仔,所以死忍唔買,
女仔衫真係靚過男仔衫好多~

ANYWAY,醫生話要照結構先可以CONFRIM性別,
唯有等多幾個星期啦~
唔知大象係唔係想整古爸爸媽媽,定係想俾個驚喜我地~
所以咁玩野~HAHA

肥羊知道可能係女後,就唔俾我食牛肉了~
話驚對皮膚唔好WOR~
又話要俾阿女學琴跳舞,
呢個爸爸,一知道佢前世情人就來出世~就特別緊張~
反而仔又唔見佢咁wor~
又話仔女沒所謂,點解待遇唔同既~haha~
不過都好既~本來都驚大象會學壞,諗住一個做好人,一個扮惡人,
依家係女,就兩個都做好人,一齊鍚個女~haha
俗語都話,女要富養,仔要窮養.

孕反應

依家都差唔多四個月了~
可以講下我的孕反應了.
其實正常人頭一個月應該都唔知自己有左~
而我的感覺就係成日肚餓.
基本上係隔一兩個鐘已經肚餓,
肥羊次次都用懷疑既眼神望住我,
但我真係肚餓.

到知道有左第二個月了,
基本上都係肚餓,係咁食~
但好奇怪~雖然食得咁密,竟然瘦左~4KG.
不過因為我好肥,所以瘦4KG,係完全唔覺LOR~
到第二個月尾,開始來料了~

踏入第三個月,
我開始沒胃口,成日哦氣,作嘔,沒精神.
間唔中有幾日,會沒精神到抬頭都沒力~
要撐住個頭做野~
幸好,我只係作嘔,沒真係嘔出來~
而幸好,呢個情況只維持了一個半月,
體重依然沒升.

到第14周,我已經少左作嘔,哦氣(當然,間唔中都會有一兩次).
而最重要既胃口,返晒來~
一個人可以食晒成個飯盒~HAHA~
體重依然沒升.

而今個星期,官方既第16周,我個人既第15周,
(因為我成日覺得自己遲左一個星期排LUN,所以自己將周數減少一周~HAHA)
胃口直情係大增,無時無刻都覺得肚餓.
另一樣野,就係今個星期,我FEEL到自己個肚漲得好緊要~肚皮開始痕癢,
體重亦都重左1KG.
睇來開始爆發了~~HAHA

八周年

每年七夕,係我同肥羊的拍拖紀念日~
眨下眼,我地已經一齊左八年,時間真係過得快.
今年七夕,咁岩我去產檢,仲可以聽到大象心跳心,
一家四口,樂也融融.
產檢完睇左埸戲,銀河守護隊,好睇呀~樹人好得意~火箭原來係浣熊,老公仲話佢係狗,相差太遠了吧~

照唐氏

話說屯院本來俾左9/7期我做唐氏,
但係大象唔夠SIZE,(4.5CM先可以照,大象得4.48CM)
差小小都唔可以照,
都好,可以見多大象一次~
其實大象已經好叻了~三個星期,由0.95去到4.48CM,
比我預期大好多~
屯院叫我18/7再去照,
左等右等,終於等到再見大象~
今次我好大期望可以見到大象性別,
如果姑娘好的話.
咁我就可以係BB展買野俾大象了~

等左半個鐘,終於到我了~
今次個姑娘比較大力~
一照肚,我已經FEEL到痛~
ANYWAY,由佢啦~最緊要照得清楚~
不過姑娘話個位唔太清楚,度唔到頸皮~
所以就叫我去抽血先~轉頭再度過,
呢個時候,就梗係我同大象講數既時候啦~
我係咁同大象講,要乖,咁媽媽先可以買好多好多野俾你~
唔知大象係唔係聽到我講,再返去時,大象已經擺岩位照了~HAHA
姑娘度完一輪頸皮後,就幫我ZOOM近大象個樣,
好清楚睇到鼻,嘴,同埋下巴,雖然個樣好似ET,
但係媽媽眼中,依然係個靚ET~HAHA

之後,姑娘竟然主動話,"依家就照下你地關心既性別了~睇下睇唔睇到先"
果下我勁開心,諗唔到姑娘主動幫我照~
當然啦~照左一輪,終於睇到~
呢個姑娘雖然好,但佢都真係幾大力~
照完我個肚,痛左成日,好彩係脂肪痛~

題外話,呢排情緒波動好大~
搭巴士,睇睇下猩凶崛起預告,都會喊~
隔幾分鐘,睇飛機總動員~又會係咁笑~
好彩隔離沒人坐,如果唔係,人地一定當我傻.
仲有就係~
呢排成日都諗起兩個仔~狗仔同大舊,
好掛住佢地~成日諗佢地會唔會投胎來左媽媽肚入邊,
再做媽媽個B,俾媽媽好好照顧佢地~
佢地兩個真係好乖,依家諗起,都會喊~~

11WEEK

漫漫長路,
大象11WEEK了~
終於明白,長憂99的意思了,
每日都諗大象有沒長大,健唔健康~
真係食蛋食到嘔.

前兩日睇死亡突擊塔,
睇唔夠15MINS,緊張爸爸就唔俾我睇了~
問佢咩事,佢話太恐怖,唔俾睇.
琴日電視劇播緊慘情,
肥羊又話喊苦喊忽,唔好睇.
呢位緊張爸爸開始胎教了~HAHA

另外,6299已經知道大象既存在了,
肥羊上星期六先斬後奏,講左先通知我,
99即時打俾我,第二日仲來屋企搵我地TIM~
99話會幫我坐月,都幾感動,
不過之後諗諗,以我火爆性格,對足一個月,會唔會有婆媳糾紛,開始擔心.

另外~另一位就來做家姐既家庭成員,肥叮,都好似知道大象既存在了.
琴日係咁嗲我,平時食完DINNER,就自己去睇風景,
琴晚食完罐罐,仲係咁跟住我,陪住我,
我係廚房煮野,佢就訓係我腳邊,
搞到我幾次都差D踩到佢~
夜晚訓覺又緊貼住我小腹訓WOR~
正一傻妹~HAHA

16/6/2014初次見面

等到頸都長,終於等到同大象見面的時刻了~
講真,我沒想像中緊張~
亦都沒擔心~
可能一路以來,都一切正常.

上晝照常返工~心情有D煩躁.
下晝,肥羊準時一點來接我收工,
因為聽講盧醫生都幾多人睇,可能要等好耐,
所以我地決定去攞左籌先,再食LUNCH~
事實證明,呢個決定係岩既~
食完LUNCH~仲未到我,
坐唔定既我就提議去附近荃灣中心行下~
點知行左沒耐,港安就打來追我返去了~

見到盧醫生,感覺熟口熟面,應該之前係講座見過面.
首先,盧醫生就梗係恭喜左我先啦~
之後就問左D普通問題,之後就上床照啦~
講真,直到訓係張床上,我依然沒麥感覺~亦沒緊張~
肥羊仲傻下傻下坐埋一邊,唔敢埋來~
直到姑娘叫佢埋來一齊睇,佢先埋來~
我地兩個真係非常生手既爸爸媽媽~HAHA~

盧醫生好快手~一照就照到個水囊,
再郁多兩下,就見水囊入邊好似有粒野~痴埋一邊~
醫生話果個就係大象了~
果下感覺就係,大象真係好細粒~
之後,醫生度度下SIZE,突然講好似聽到心跳,
仲開埋俾我地聽,果下,就真係有D感動了~
但係聽唔夠幾秒鐘,醫生就熄左機了~
所以感動亦只係KEEP左幾秒鐘而已.
好彩,醫生開左心跳俾我地聽,我果下先真正意識到有個小生命係我肚入邊~
之後,醫生話大象SIZE得0.945,唔夠8WEEK,最多係7WEEK,所以延遲左預產期,
所以我跟住落來既任務就係長胎,
以蛋,奶為生.
肚餓呀~食蛋啦~
口渴呀~飲奶啦~
幸好,我最近沒麥胃口,食咩對我來講都只係為左大象.

就係咁,同大象既第一次見面,完美結束,
之後,我為左獎勵自己,
食左碗酸辣米線,仲飲左半罐士多啤梨乳酸酒~HAHA~好HAPPY呀~
期待下次同大象見面~
下次係9/7照OSCAR,
希望大象可以追返SIZE,成功照到OSCAR啦~
媽媽會KEEP住每日食蛋&奶,你快D出盡力吸收啦.

攞證明&排期

時間來到星期六(24/5/2014),
知道大象入住後~
唔知點解,時間過得好慢,
我每日都好想感覺大象存在,
奈何係咩感覺都沒~
終於,等到星期六,正式睇醫生攞證明~排期~

但係,聰明的我,習慣出門口前去一去廁所,
SO~去到樓下診所,排第一既我,一滴尿都痾唔出~HAHA
返屋企飲左成杯水,強逼自己痾左兩滴.
(我真係死蠢,驗孕要尿都唔記得~)
醫生仲要同我講,唔係晨尿,可能驗唔到~
好彩,呢頭俾護士,都未坐低,已經叫我地入去~
好明顯有條淺線,我驚醫生唔開證明俾我,仲要啦啦聲係手機搵前幾日既綠D相俾佢睇,
醫生叫我放鬆D~有線就係有了~
之後,長氣醫生就開始解說孕婦需知,同埋要留意D咩~
一講就講左半個鐘,果時已經11點,
因為屯院好近我屋企~所以諗住仲有大把時間,慢慢搭輕鐵過去~
點知,意料之外既事又發生了~
原來屯院係唔接受產檢架~要去母嬰院.
因為唔想再請假排期,
我同老公即時決定飛的去仁愛母嬰院,
幸好,去到母嬰院都係11:30.
登記完後,仲諗住係附近食下野,因為又肚餓了~
點知~~~~母嬰院又叫我地返去屯院登記唐氏~
陰功,星期六關係,屯院收12:00,
我地再飛的去返屯院,
終於,12點前搞掂所有野~
完全沒諗過,排個期搞到好似RUNNING MAN咁,好頻仆~
(呢期狂煲緊RUNNING MAN,上左腦~HAHA)

不過政府產檢真係好遲,
母嬰院第一次產檢已經排到7月中,果時我差唔多三個月了~
而唐氏反而早D,7月頭~
所以,我另外BOOK左私家6月中產檢~
一於就公私一齊,確保大象住得舒舒服服~HAHA

大象終於來了

努力左半年,終於成功了,
正當我就來放棄,連家計會都約埋既時候,
大象不知不覺中入住左我肚中,
(我肚腩咁大,希望佢住得舒服啦)

講真,真係沒諗過原來咁難,
我自問M期一向好準,身體又唔差,只係肥左D~
次次都係排LUN期DO,硬係就個個月都失望,
雖然話半年唔係好耐,但在我心目中,應該係一DO即有,
等我地平時仲左避右避.

講返正題,
其實本來呢個CYCLE期望不大,
因為我上個月睇左中醫,
飲完藥後,竟然成個月都CHECK唔到排LUN,
(即係紅D一直只有70%紅)
所以一直都好放鬆地食玩,
撞岩本小姐生日,仲去左轉珠海澳門三日兩夜遊,
狂食BUFFET,魚生,生牛肉,雪糕就梗係唔少得,
點知,本小姐生日(17/5)果日竟然沒來M,
(沒錯,今個月DUE DAY就係本小姐生日正日)
以為遲來啦~所以都沒理,19/5仲飲左杯凍蘋果綠茶,
點知,一飲完即刻肚痛,當時既我,仲傻下傻下,以為經痛~
果日夜晚,真係見紅,
我仲墊埋M巾,等M到.

好彩大象大命,之後幾日沒再見紅,
果時,我就開始懷疑了~
21/5,一早就CHECK綠D,紅D,棒,三料齊來~哈哈.
果然,褲都未著好,已經見到棒棒有線,之後綠D好淺線,紅D就深粗.
哈哈,大象,爸爸媽媽等左你好耐了~你終於來啦~
果時係早上五點幾,
我已經急不及待話俾肥羊聽,
之後,兩公婆就齊齊訓唔著了~HAHA
再之後,我就後悔自己點解食左咁多無謂野~勁內疚~
所以,大象,你一定要係媽媽肚入面乖乖地成長~
媽媽會乖,唔再亂食野了~

搭巴士

話說我地上急救班.
係搭巴士返家途中,
無無聊聊.

我:"D人知唔知你上急救班呀?"
(D人指肥羊D同事"

肥羊:"下?"

我再問多次,"D人知唔知你上急救班呀?"

肥羊:"下?D人點解要知我上左九巴呀?"

果下,我已經笑到傻左~講唔到野,

肥羊仲傻下傻下,問多次"邊D人要知我上左九巴?"

天呀~點解個傻佬咁搞笑~HAHAHA~

P.S. 上星期發生既事,我依家一路打,都仲係笑到傻左,睇來我笑點真係好低,HAHAHA~

肥叮作息

原來我已經有兩個幾月沒寫過BLOG~
其實有好多野寫架~
特別係肥叮,呢條茂利越來越肥,越來越搞笑~HAHA~
講講我地過年去左台灣旅行五日~,
肥叮小姐好似已經慣左屋企會突然沒人幾日~
所以非常乖,完全沒搗亂,仲肥左TIM~
日日都有痾屎,仲識分散投資,
雖然有舊屎飛左出來,HAHA~

 

呢位小朋友依家一見到我坐SOFA,

就會自動自覺跳上來訓覺,

有時我想合埋腳坐,佢都會喵到你分開腳俾佢有位訓為止.

 

因為知道朋友隻貓晚晚搞到佢地公婆訓唔好,

所以我想紀錄低叮既作息生活~

叮其實都有夜晚起身既習慣,

不過佢淨係起身一次,同埋淨係搞肥羊一個,

可能佢真係太愛佢老豆了,

晚晚都會狂LAM肥羊頭髮&面,

有時LAM得太大聲,會吵醒埋我TIM~

不過我多數都會一覺訓天光~^0^

叮都算乖了~

由晚晚狂奔,到依家一夠11點幾就自己上床訓覺~

訓到半夜食宵夜,再搞下肥羊,然後再訓過~

之後就要等鬧鐘響,佢先會再起身,狂喵到我地起身為止.

 

今年元宵同情人節同日,

間間鋪頭都係人~

我地呢d老夫老妻就梗係揀間沒人既鋪頭,最緊要坐得舒服~

呢間處於屯門工業區,前身仙桃園,

最近推出左雞煲,

份量十足,仲有雪花肥牛,價錢又平~

兩個人埋單都係一百蚊,

又可以罷張四人台,very good ar~最緊要係情人節沒加價~haha~

另外,今年情人節竟然有驚喜,

不嬲情人節沒送禮物既肥羊買左salad袋俾我,

仲要打孖上,佢話有份係叮送ge wor~

真係窩心~

仲要收係廁所~haha~真係好驚喜呀~

(雖然個款唔係我like果隻)