2013回顧

今日係公司閑閑地~
突發奇想,寫返篇2013回顧,
請真2012年過得好開心,好平淡,係我同老公既HONYMOON年~
二人世界左成年,係2013年,我地決定加新成員,
但係呢個新成員真係來之不易~
中間經歷了痛苦,折磨,認清了人性險惡,
亦都認清了何謂朋友,認清了某個人真面目.
新成員就係貓貓了~HAHA~
2013上半年,真係痛苦中渡過,
由某人應承俾貓我,到佢條女打來發爛渣,無辜被罵.
雖然之後個女人有打來SAY SORRY,仲話有第三者,係我面前痛哭流涕,
但中間太多大話,我已經深深認清楚呢兩個人真面目,以後沒朋友做~

之後,兩隻仔仔出現,我全心全意照顧佢地~
但卻先後因fip離世~心痛感覺,依家依然難捨~
頭半年就係咁樣過了~
我只可以同自己講,係上天俾我既考驗,
上天想我提早感受痛苦離別既感覺~
亦都令我明白,好多野,強求唔來,勉強沒幸福~
當你好想要某樣野,用盡一切方法~到頭來,反而更加痛苦.
幸好一路有肥羊係身邊,支持安慰我~

就係呢個時間~上天可能可憐我,
安排了囡囡出現,我地生命中既真命天女~
肥叮既出現,令我地家又出現了笑聲,
重回快樂~要再次多謝benny哥,送隻貓貓俾我~
呢隻玩皮既嗲精,帶左好多快樂俾我地~
雖然佢成日搞搞震,但只要佢一跳上我地大脾,就咩氣都沒了~

呢位體操運動員,琴日發現左新玩具,我地既晾衫架~爬左上去,又唔敢跳返落來~
正一無膽貓.
叮叮已經九個月了~爸媽只想你每日都過得開心快樂.
2014年依然食得訓得玩得痾得.
而2014年,我地係受到各方長老既壓力下,
決定要進行另一項大工程~希望一切順利~

慶祝棉婚

時間過得真係快~

眨下眼,已經結左兩年婚了~

不過,第二年肥羊已經唔同我一齊過結婚周年了~

原因係佢公司X'MAS PARTY竟然係同一日~

而且獎品吸引~幾乎人人有份~

幸好,呢位先生都仲識做~

送左扎花俾我,HEHE~

今次顏色揀得唔錯,算你啦~HAHA

 

呢份就係獎品了~

好彩唔係抽到冬菇~

都算有交代.^^

呢部野可以WIFI過相,禁兩個制就可以過到手機,勁方便,

而且好細部,單手可以影相.

我係街見到,竟然要$3680,

原來我老公都算係抽到份大獎,真係抵錫.^0^

 

周年正日,約唔到老公,梗係搵老死啦~

老死kimmy姐,一聽到我慘況,

即刻問我想食咩,佢book台,

kimmy姐辦手,100%放心~

一星期前已經book左台食雞煲,

沒錯啦~我咁大個女竟然一次雞煲都沒食過~

同肥羊講左m次想食~

都無動於衷,呢d就係老公了~

好彩仲有老死~

呢間至至尊雞煲真係唔錯,

任食任飲,而且仲有熟食~

飲品櫃選擇多到同7仔差唔多,

真係沒介紹錯,

飽到頂住個胃,第二日早餐都食唔落.

 

再講下老公點同我慶祝,

老公早一日來接我收工,

食泰國菜,

呢d泰國菜真係唔錯,

份量十足,價錢又唔貴,

而且有卡位坐,裝修又新~

兩個人叫左成台餸,都係三百蚊度,抵食~

食左兩日,即刻感覺自己肥左好多~

 

今個月仲有件大事,就係哥可結婚,

肥羊阿哥今日終於娶老婆啦~

我終於有阿嫂了~

雖然同阿嫂唔熟,

但係都可喜可賀.

 

本來以為阿嫂入門,

第一年冬至,一定會大搞,

點知,早兩個星期已經約好冬至正日食飯的99,

竟然話要去舅父屋企打牌而取消.

延遲一星期先做節,

對於圍村大既99來講,

真係有d奇怪~

anyway~冬至正日係屋企食,自家煮~

宜家肉丸,真係勁方便,勁好食~

就咁叮5mins,肉味已經出晒來~

再配埋果隻紅色果醤,

兩個人食左20粒~haha~

仲有牛扒,今次失手,

波太耐,老到咬唔到~掉左~

雲吞沒得輸,好味~

仲有蘋果酒(我地呢期好酒,屋企突然多左紅酒,梅酒,蘋果酒)

最後加埋個半磅芒果蛋糕~perfect~

我同老公就係咁易滿足ge了~haha~

 

 

再講下我家另一成員,肥叮.

呢隻叮除左用八掛,肥來形容佢,

都諗唔到第二個詞,

呢期佢好like係廚房望風景,

望到忘我境界~

同埋呢~我開始信,女女係爸爸前世既情人,

佢除左晚晚坐爸爸大脾睇電視外,

前晚開始,成晚訓係我同肥羊中間,

仲要係打橫訓係被面,

令到我兩公婆完全掂唔到對方~係全晚都係~

真係令人無言~

再接再厲

話說上個月跟足指示,都係食白果後,真係有D失望,
無奈唯有繼續努力啦~
最近好似特別多明星懷孕生B事件,繼大S前日宣佈有左,
琴日諸葛生左,今天陳太又生埋,
而我有個結左婚三年既舊同學都終於有左了~
一件連一件,有D衝擊~HAHA~
不過我有不斷叫自己,唔好心急,唔好緊張~
始終我地都係剛剛開始~
只係事實證明,生B唔係一擊即中,
今個月揭曉日係我地結婚周年日,
希望上天可以俾個好消息我地啦~

PS,老細無啦啦話過年公司去旅行,人地PLAN緊生B~已經特登避旅行,當平到笑既機票隱形,
仲要去台灣五日~近近地去澳門算啦~真係無奈=_=

準備中

話說本身唔想生bb既我地,上年年尾做左孕前檢查,準備生bb~
but~貪玩既我地,又一路都沒停過去旅行,
明知去旅行,就梗係唔會搞搞震啦~
去完六月既台中之旅,諗住係時候了,因為想生馬b~時間差唔多了~
點知,又無啦啦入左院住左三日,全身檢查左一輪,
當然有照波呀,光呀之類既儀器~
所以醫生就叫我地兩三個月內唔好有住.
到了十一月,台北之旅都去埋了~
我又終於搵返我讀書時睇既中醫,調理身體,
一切好似勢在必行了~
肥仔bb~爸爸媽媽會開始努力,盡快帶你來呢個世界了~haha~

除頭罩

肥叮終於除左帶足兩星期既頭罩了,

開心到成晚周圍跑,

有d懷念果兩星期,佢晚晚乖乖訓覺既日子,

不如幫佢帶返啦~(講笑)

一除頭罩,就狂lam自己十幾分鐘,

特別係傷口,

好彩狠心沒幫佢除頭罩,

如果唔係,實lam到傷口發炎.

人地話貓地絕育後會溫順d~

but我肥叮琴晚竟然咬我,

仲要連扑我隻腳兩次,

之前完全未試過咁~

就因為我唔俾佢去廁所玩,

之前都唔俾ge啦~

激死我,

難為我咁鍚佢,為左小小事而咬我~

POST你全相上網,哈哈!!

 

 

星期日去左沙田宜家,

因為某D原因,之後可能要經常去沙田,

希望唔使啦~

去轉沙田要成個鐘,來回兩個鐘呀~陰功~

 

元朗蛇更,

想食好耐,終於俾我試到了~

麻麻地,都係荃灣好食D~勝在有套餐,超飽.